Իսրայելական ութ ավիահարված է հասցվել Սիրիայի հյուսիս-արևմուտքում գտնվող Աբու էլ-Դուհուր ռազմական ավիաբազային. թիրախում են եղել թռիչքուղին և պահեստային տարածքները, հաղորդում է Reuters-ը։

Հաղորդվում է, որ զոհեր չկան։

Բազան, որը գտնվում է Թուրքիայի սահմանից մոտ 70 կմ հեռավորության վրա, 2013 թվականից ի վեր չի օգտագործվում որպես մասնագիտացված ռազմական օդանավակայան և Սիրիայի 14-ամյա քաղաքացիական պատերազմի ընթացքում մի քանի անգամ անցել է ձեռքից ձեռք՝ նախկին նախագահ Բաշար Ասադին հավատարիմ ուժերի և ընդդիմադիր ուժերի միջև։

Ռազմական աղբյուրի տվյալներով՝ 2024 թվականի վերջին Ասադի իշխանափոխությունից հետո բազան օգտագործվել է որպես սիրիական նոր բանակի ուսումնական կենտրոն։

Այս հարվածները հասցվում են Իսրայելի և Թուրքիայի միջև անվտանգության ոլորտում լարվածության սրման, ինչպես նաև Սիրիայի հարցով երկու երկրների միջև ավելի ու ավելի կոշտ հռետորաբանության ֆոնին։

Թուրքիայի արտգործնախարար Հաքան Ֆիդանը օգոստոսի 6-ի իր ելույթում հայտարարել է, որ Իսրայելը իր բազմակի հարձակումներով շարունակում է սպառնալ Սիրիայի անվտանգությանը, և կոչ է արել ճնշում գործադրել Իսրայելի վրա՝ հասնելու համար, որ այն հարգի Սիրիայի տարածքային ամբողջականությունը։

Իսրայելի պաշտպանության նախարար Իսրայել Կացը, իր հերթին, ուղիղ նախազգուշացում է հղել Թուրքիայի նախագահ Թայիփ Էրդողանին՝ հայտարարելով, որ Իսրայելը թույլ չի տա այնպիսի քայլեր, որոնք կուժեղացնեն Սիրիայի ռազմական ներուժն այնպես, որ դա կարող է սպառնալիք ներկայացնել Իսրայելի համար։

Օգոստոսի սկզբին Սիրիան երկրի հյուսիսում անցկացրել է օդային զորավարժություններ՝ ռուսական արտադրության ՄիԳ-21 կործանիչների կիրառմամբ։ Դրանք Ասադի տապալումից հետո առաջին նման զորավարժություններն էին։

Իսրայելական Kan հեռարձակող ընկերությունը օգոստոսի 11-ին հայտնել է, որ իսրայելական անվտանգության ծառայությունների աշխատակիցները հայտնաբերել են նշաններ, որ Սիրիան արագացնում է իր ռազմաօդային ուժերի վերականգնման ջանքերը, ներառյալ նոր օդաչուների հավաքագրումը, թռիչքային պատրաստությունը և կործանիչների մասնակցությամբ առաջին զորավարժությունները։

Kan-ը, հղում անելով իսրայելական անվտանգության ծառայությունների աղբյուրին, հայտնել է, որ Իսրայելը ուշադիր հետևում է զարգացումներին և իր մտահոգությունները փոխանցել է Միացյալ Նահանգներին։