Maritxu Kajoi Komisiñoko kideek gaur eman dute egitarauaren berri Zeziaga denda ohiaren aurrealdean; hain zuzen ere, erakusketa jarriko duten lekuan. Arrasaten hain kuttuna den ospakizunaren 50. urteurrenean keinu egin gura izan diote Maritxu egunean arrasatear asko eta asko jantzi zituen dendari. Hala jarri dute atean: "Topa Ceciaga dendan eta bertako langilien omenez, 104 urtez mondrauetarrok elegante janzten lagunketiarren!" Egunean bertan, urriaren 2an, eskapularioak –urre kolorekoak– saltzen ere izango dira han.

Horrez gain, beste berritasun bat da egubakoitz eguerdi horretan kontzertu bat egongo dela; taldearen izenaren berri astelehenean emango dute.

Bestetik, aurten, Arrasateko gaiteroek jasoko dute Maritxuren inbutu preziatua. Komisiñokuek adierazi dute gaitero barik ezin dela jairik egin eta hortik dator omendu gura izatea. Maritxuren berbak jasota hala adierazi dute: "Herrixa ezta herri jai barik, eta jaixak eztie jai gaitero barik. Horregatik maite ditxut hainbeste urtetan gure herriko jaixei doinua emun dotzen talde hau".

Herritarrak inbutuaren emate-ekitaldira gonbidatu dituzte irailaren 25ean, egubakoitzean, 18:30ean, Maritxupean. Bukaeran, gazta eta ardoa eskainiko diete elkartutako guztiei.

Irailak 25, egubakoitza, Nobenaixoa

• 18:30 Arrasateko gaiteroei omenaldia. Ondoren, gazta eta ardoa.

Urriak 2, egubakoitza, Maritxu Kajoi Eguna

• 08:00 Etxafuego jaurtiketa.
• 12:00 Burrunbazaleak txaranga, kaleak girotzen.
• 12:00 Txosnagunearen irekiera.
• 18:30 Txosnagunearen irekiera DJekin.
• 19:00 Oria txaranga Herriko Plazan eta inguruetan.
• 20:30 Maritxuri lore-eskaintza Herriko Plazan.
• 21:30 DJak txosnagunean.
• 23:00 Dantzaldia Herriko Plazan Luhartz taldearen eskutik.