Mutriku eta Ondarroa artean kokatuta dagoen Mijoa auzoko bizilagunek San Jeronimo festak ospatuko dituzte asteburu honetan zehar, ohitura dutenez, ekitaldiz beteriko egitarau batekin.

Jai Batzordeak berrikuntzaren bat antolatzen du urtero eta aurtengoa ez da ezberdina izango.

Izan ere, festak abiatzeko lehen aldiz prestatu duten auzoen arteko herri kirolen desafioa egongo da larunbat honetan, 17.30ean hasita.

Olatz eta Ibiri auzoek talde bat osatuko dute, eta Galdonamendi eta San Jeronimok beste bat. Bi taldeetako kideek hainbat modalitatetan arituko dira: harriak jasotzen, lokotxak batzen, txingak eruaten, ingudean, trontzan, aizkoran, korrikan eta sokatiran, hain zuzen ere.

Desafioaren ondoren pottokak eta zezen txikiak egongo dira; eta horiek amaitzerakoan, Laket taldearekin erromeria (20.30ean), txokolatada eta auzoko DJ-ak.

Igande honetan haurrak izango dira festetako protagonista nagusiak. Hasteko jolas erraldoi dinamikoak eta txirrista erraldoia egongo dira 11.30etik aurrera; eta horren ondoren, auzotarren bazkaria.

Edonola ere, San Jeronimo eguna hilaren 30ean ospatzen da eta horregatik datorren asteazkenean ere zerekin gozatu izango da auzoan: 12.00etan meza egongo da eta horren ondoren herri kirolak, auzotarren bazkaria eta errifen zozketa. Urtero legez, Mijoara joateko herribusa izango da San Jeronimo egunean.