Paro últimamente poco per Mieres. Y esto va dir a más. Mieres cada vuelta tien menos que ver cola Santa Marina na qu'estudié de críu, nin cola xente cola que fui al institutu (que, como dicía Max Aub, esi tiempu ye la verdadera patria), nin col Mieres nel que trabayé y viví tantos años y lo sigo faciendo dacuando. Y ye que, prendo la tele y namás veo a unos faltosos dándo-y glayíos al ministru que vino a inaugurar el nuevu cuartel de la Guardia Civil. Como al nuestru presidente del Principáu o al nuestru alcalde, porque taben con él. Y non porque actúen como xente que nun tuvo la suerte de recibir una educación, sino por facelo simplemente como energúmenos. Cola furia barata del faltosu. Cola violencia babaya del que se siente dueñu de la razón. Cola exaltación del borrachu qu'a última hora de la nueche nun sabe más que canciones patriótiques.

Paro tovía menos per Uviéu. Por más que seyan les fiestes de San Mateo. Sigo la tradición de mio madre que, viviendo n'Uviéu, namás que llegaben les fiestes dicía: «Toos pa Teberga, qu'equí nun hai nada que facer: xente d'Uviéu, tambor y gaita». Y más agora cuando l'alcalde d'Uviéu ye de Teberga y acaba d'armar la qu'armó con unes declaraciones dafecho desafortunaes sobre les agresiones d'una banda de mierdanes que s'escuende detrás d'una bandera que deshonren colos sos actos. Nel únicu chiringuitu que paramos ye'l de la Taberna Narciso na plaza Porlier, nálcordanza de la Taberna Narciso orixinal, la de Samartín de Teberga. Un llugar perfectu después d'asistir a la estrena nel Teatru Filarmónica de la serie 'Asturies, el pasado que somos', presentada por Ángeles Caso. Anque namás seya por comprobar que los neandertales teníen yá d'aquella más educación y cultura qu'estes recues de burriquinos de papá que nun saben más que dar coces.

Aprovechamos pa marchar otra vuelta más pal sur. Y nun ye que la cosa meyore ellí pa ónde vamos. Namás meyora'l tiempu, la lluz y l'agua. Polo demás, estes bandes de vocingleros estiéndense per toles partes: nun hai más que ver lo que tá pasando en Ceuta, les noticies que lleguen del mio queríu Puertu de Santa María onde un conceyal de cultural retira un mural escultóricu (y nun lo fai por ideoloxía sino por ignorancia) o como sigue Valencia después de la dana onde continúa ensin tener naide responsabilidá de nada. Pero, pa nosotros, los asturianos, el sur ye onde a mediudía too tá enlleno de lluz. Y onde nos quitamos d'enriba l'alma toa esta nublina, esti orbayu y esta fresca de la mañana, y pensamos que por haber meyor tiempu, tener más lluz y tar más caliente l'agua, la xente va ser meyor. Fatos que somos.