09/10/2026 a las 12:10h.

'Hauspo bat bihotzari' ikuskizuna larunbat honetan, urriaren 10ean, izango da Baztartxo antzokian, 19:00etan. Musikak, bertsoek, dantzak, olerkiak eta pinturak bat egingo dute emanaldi honetan, trikitixari eta erromeriaren munduari gorazarre egiteko. Sarrerak www.azkoitia.eus/agenda webgunean eros daitezke aurrez, 5 euroren truke.

Andoni Salamero sustatzailearekin batera, hainbat artista eta musikarik hartuko dute parte ikuskizunean: Lurdes Alkorta, Xabier Alberdi 'Zabale' eta Aitor Furundarena musikariek; Gorka Larrañaga margolariak; Bizkargi Musika Eskolako trikitilari eta pandero-joleek; Andoni Egaña bertsolariak; eta Garazi Etxaburu dantzariak.

Ikuskizunaren sustatzaile Andoni Salameroren hitzetan, «festa giroan itxuratutako emanaldi gisa irudikatutako ikuskizuna da, eta instrumentu horrek euskaldunoi eskaini diguna garenaren agerbide eta argibide izatea nahi du».

Ikuskizunak trikitixaren inguruko ikuspegi zabala eta osoa eskaini nahi du, eta, horretarako, ez da trikitixa-piezak jotzera mugatuko. Erromeria giroan, narratzaileak, prosa poetikoz idatzitako gidoi baten bidez, festaren osagai bakoitzak —panderoak, soinu handiak eta txikiak, koplak, trikitilariak, pandero-joleak, dantzariak eta herriak— bat egiten dutenean sortzen den emozio bereziko giroa azalduko du.

Izan ere, Salameroren arabera, trikitilariak trikitixa behar bezala sortzen du bizitzaren egoera hori bizi eta bere baitan haragitzen duenean.