Bueltan da, hirugarrenez, Gasteizko Euskaldunentzako Jabetze Eskola. UEUk antolatuta, ikastaroa urriaren 13tik azaroaren 24ra bitartean egingo da, asteartero, Izaskun Arrue Kulturgunean.

Egitasmoaren helburua da euskaldunei hizkuntzaren inguruko "kontzientzia kritikoa" lantzeko tresnak eskaintzea, euskararen normalizazioan eta biziberritzean eraginkorragoak izateko. Jabetze eskolen oinarriak mugimendu feministan kokatzen dituzte, "egiturazko zapalkuntza" egoerak identifikatu eta horiei aurre egiteko estrategiak garatzeko baliagarriak direlakoan.

Aurreko bi edizioetan landutako bideari jarraituz, parte hartzaileek euskararen soziolinguistikan sakontzeko aukera izango dute, baita euskararen aldeko mugimenduaren erronkak eta aukerak aztertzekoa ere. Antolatzaileen arabera, helburua da euskaldunak "jantzi, jabetu eta ahalduntzea", gizartearen eraldaketan eragile aktibo izan daitezen.

Aurtengo programazioan hainbat gai jorratuko dituzte: aldaketa sozialeko prozesuak, eremu urbanoetako euskararen aldeko mugimenduen berezitasunak, justizia sozialaren ikuspegia eta euskararen gaitasunaren zein kalitatearen inguruko eztabaidak. Era berean, saioetan sortzen den ezagutza Gasteizko euskalgintzako eragileen eskura jartzea ere bada xedeetako bat.

Eskolaren dinamizatzailea Manex Agirre Arriolabengoa izango da. Haren hitzetan, jabetze eskola batek ez du soilik prestakuntza eta ezagutza eskaini behar; "eragiten laguntzeko" tresnak ere eman behar ditu.

Ikastaroa euskararen eta euskalgintzaren inguruan interesa duen edonori zuzenduta dago, eta matrikula egiteko epea urriaren 12ra arte egongo da zabalik.