20/10/2026 Actualizado a las 20:15h.

Alegazio epea itxita, onartu berri da alkate dekretuz etxebizitza tasatuen urteko hirugarren zozketarako eskatzaileen behin betiko zerrenda. 190 familia-unitate daude behin betiko zerrendan. Denek dute zerrenda ikusteko aukera SMS bidez jaso duten kode baten bitartez.

Zerrendan daudenen errolda (Oiartzunen erroldatuta daudela) eta etxe-premia datuak soilik gainbegiratu dira. Esleipenduna izaten denak etxebizitza tasatua eskuratzeko baldintza guztiak betetzen dituela ziurtatu beharko du: Oiartzunen erroldatuta egon eta etxe-premia duela ziurtatzeaz gain, diru-sarreren muga ez duela gainditzen justifikatu beharko du. Zozketa egin eta 20 eguneko epean (10 eguneko luzapena eskatzeko aukerarekin), beharrezkoa den dokumentazioa eskatuko dio esleipendunari udalak. Epe horretan eskatutako agiriak aurkezten ez badira, uko egin dela ulertuko da eta itxarote-zerrendako lehenengoari eskatuko zaio dokumentazioa.

Etxebizitza tasatuen urteko hirugarren zozketan Arragua auzoan dagoen bi logelako etxebizitza bat zozkatuko da, bigarren eskukoa berau. Ez du garajerik eta trastelekurik. 178.143euroko behin-behineko prezioa du (BEZik gabe).

Zozketa urriaren 28an egingo da, goizeko 10:00etan Landetxe Kultur Aretoan. Publikoa izango da, «hala nahi duen edonor joan daiteke». Zozketa udalaren webgunetik zuzenean jarraitzeko aukera ere izango da.

Behin betiko zerrendan dagoen interesdun bakoitzak zenbaki bat du esleituta –behin betiko zerrendan azaltzen da–. Zenbaki horiek dira ontzian sartzen direnak. Hala jakinarazi du Udalak.

Etxebizitza zozkatuta, itxarote-zerrenda osatzeko zozketa egingo da. Horretarako zenbaki bakarra aterako da; hurrenkeran osatuko da itxarote-zerrenda, etxea tokatu zaion zenbakira bueltan iritsi arte.