Det var torsdag føremiddag at politiet gjekk til aksjon ved det nedlagde Bruvoll fengsel i Nord-Odal i Innlandet.

Sjølv om dette skjedde i Innlandet, var det Øst politidistrikt som gjennomførte aksjonen.

Det stadfesta politiadvokat Ingrid Hærem i Øst politidistrikt i ein e-post til NRK torsdag ettermiddag:

– Øst politidistrikt har i dag gjennomført ein planlagd aksjon mot gamle Bruvoll fengsel i Nord-Odal, og det blir no gjennomført kriminaltekniske undersøkingar på staden. Dette vil gå føre seg i noko tid.

Hærem skreiv vidare at det er fleire pågripne i saka, og at desse er sikta for medverknad til grov narkotikaovertreding, og det blir vurdert varetektsfengslingar.

Politiet ville ikkje ut med fleire detaljar om kor mange som er pågripne. Heller ikkje om kva slags narkotikakriminalitet det er snakk om.

– Saka er i ein heilt innleiande fase, og av omsyn til etterforskinga kan vi ikkje gå ut med fleire opplysningar på noverande tidspunkt, skreiv ho i e-posten.

Ifølge avisa Glåmdalen var det torsdag ettermiddag eit tosifra antal politifolk i arbeid på staden.

Det vart også brukt politihund.

Torsdag kveld jobba fleire kriminalteknikarar på tomta.

Advokat Wali Gilani er forsvarar for ein av dei sikta i saka.

Då NRK snakka med han like før kl. 19 torsdag kveld, hadde han akkurat møtt klienten sin.

Gilani kunne ikkje seie noko som helst om korleis klienten hans reagerer på siktinga.

– Det har eg ingen kommentar til, sidan etterforskinga i denne saka er klausulert.

Gamle Bruvoll fengsel vart bygd som leir for sivilforsvaret, men var i drift som fengsel frå 2006.

I 2019 var det lagt ned, og i 2021 vart det seld til private kjøparar.