26/08/2026 Actualizado a las 12:57h.

Bertsolari Gazteen L. Lizardi Saria Zarauzko Euskal Astearen barne lehiatu izan ohi da eta ostegun zein ostiralean finalera sailkatuko diren sei bertsolari gazteak zein izango diren erabakitzeko, bi kanporaketa egingo dira.

Bakoitzean zortzi bertsolari gazte izango dira eta ostegunean getariar ordezkaritza izango da, lehen kanporaketan.

Ez da Amets Aizpurua getariar bertsolari gaztearen lehen esperientzia sariketa ezagun honetan. Joan den urtean ere bertan izan zen eta orduan saikatzerik ez bazuen izan finalera, ostegun gauean aukera berria izango du.

Kanporaketan puntuazio onena lortzen duen bertsolariak finaleko txartela eskuratuko du, bai gaur eta baita biharko sailkapen kanporaketetan. Finalean (irailak 4) arituko diren beste lau bertsolariak bi egunetan puntuazio hoberenak lortzen dituztenak izango dira.

Osteguneko saioan. Amets Aizpuruarekin izango dira oholtza gainean Araitz Katarain (Mallabia), Bittor Altube (Abadiño), Ekhiñe Zapiain (Bera), Haizea Arana (Eskoriatza), Julene Iturbe (Azkoitia), Uxue Alkorta (Zarautz) eta Maddi Aiestaran (Beasain). Aimar Sorazu izango dute gai jartzailea.

Bertso saioa gaueko 22:00etan hasiko da eta sarrera doakoa da. Santa Klara aretoan izango dira zortzi bertsolariak eta ostiralean beste horrenbeste izango dira lehian, honako hauek; Adei Urbitarte (Zarautz), Eki Mateorena (Leitza), Haira Aizpurua (Sara), Mikel Etxezarreta (Olaberria), Martin Abarrategi (Aramaio), Suhar Gesalaga (Azpeitia), Irantzu Idoate (Hazparne) eta Ekain Tolaretxipi (Hernani). Maite Aizpuruak jarriko dizkie gaiak.