Eusko Jaurlaritzaren Industria, Trantsizio Energetiko eta Jasangarritasun Sailak antolatuta, Ihoberen eta Energiaren Euskal Erakundearen lankidetzarekin, Klima eta Energiaren Astea ari dira egiten, urriaren 16tik 25era, Araban, Bizkaian eta Gipuzkoan. Egitasmo horren barruan, Klima Azoka da jarduerarik aipagarrienetako bat. Hamar herritan egingo dute, eta horietako bat da Azpeitia. Ostiralean, urriak 23, izango da.

Zazpi karpa tematiko egokituko dituzte plazan eta klima aldaketaren inguruko kontzientziazioa eta jasangarritasuna landuko dira, jolasen eta jarduera interaktiboen bidez. «parte hartzaileek jasangarritasunari eta ekonomia zirkularrari buruzko edukiak ezagutzeko eta klima aldaketari aurre egiteko egunerokoan har daitezkeen neurriak aztertzeko aukera izango dute», esan dute antolatzaileek.

Jarduerak bi txandatan egingo dira. 10:00etatik 14:00etara, Lehen Hezkuntzako eta Bigarren Hezkuntzako ikasleei zuzenduta egongo da azoka. Arratsaldean, berriz, 16:00etatik 18:00etara, herritar guztiek parte hartu ahal izango dute. Eguraldi txarra egiten badu, bertan behera geratuko da Klima Azoka. Informazio gehiago nahiz gero, www.asteklima.eus atarira jo daiteke.