Iraurgi Berritzenek, Laienek -Urola Erdiko Ingurumen eragileak- eta Azpeitia, Azkoitia, Zestoa, Beizama, Aizarnazabal eta Errezilgo udalek 'Urola Erdia Ispiluaren Aurrean' prozesua ipini zuten abian pasa den urte amaieran, eskualdeko erronka sozial eta ingurumeneko nagusiak modu ulergarrian azaltzeko, kanpaina bateratu batean. Honela, kanpainak nola mugitzen garen, nola berotzen garen edo zer erosten dugun, etorkizuneko Urola Erdian izango duten eragina azaleratu nahi du.

'Urola Erdia Ispiluaren Aurrean' prozesuaren barruan, energia, elikadura eta garraioaren arloko erronkei erantzuteko estrategiak zehaztuko dira. Udaberrian herritarrei zuzendutako hitzaldi-zikloa egin zen, eta ondoren parte-hartze saioak antolatu ziren eskualdeko herrietan. Oraingoan, jasotako gogoeta eta lehentasunetatik abiatuta, eskualdeko eragileen ikuspegia eta jarduteko aukerak jarriko dira mahai gainean.

Hurrengo lan saioa Azpeitian izango da, datorren urriaren 28an, asteazkenez. Herritarrek eta gizarte-eragileek trantsizio ekosozialari begira adostu zituzten lehentasunak. Orain, esparru bakoitzean aurrera egiteko lehentasunezko jardun-ildoak identifikatzea da helburua, eskualdean energiaren, elikaduraren eta garraioaren arloko erronkei erantzuteko.

Eskualdeko hainbat sektoretako eragileek hartuko dute parte: industria, hezkuntza, merkataritza, ekintzailetza, turismoa, gizarte-eragileak, administrazioa eta interesa duten herritarrak. Denen artean, datozen urteetarako lan-ildoak proposatuko dira. Lan-saioa 'Urola Erdia Ispiluaren Aurrean' prozesuaren beste urrats bat izango da.

Goizeko 09:00etan abiatuko da jardunaldia, Basazabal jauregian. Hiru adituk esperientzia inspiratzaileak aurkeztuko dituzte, ondorengo lanerako abiapuntu gisa.

Elikaduraren arloan ariko da estraineko gonbidatua. Mikel Romanek Tokixan aurkeztuko du, Debagoienako Elikadura Estrategiaren esperientzia. Tokiko elikadura-sistema indartzeko administrazioaren, lehen sektorearen, enpresen eta gainerako eragileen arteko lankidetza du oinarri.

Garraioaren arloan, Diego Gomezek, INTRAko kideak, Urola Erdiko garraioaren ekintza-plana aurkeztuko du. Urola Erdiko mugikortasunaren diagnostikotik abiatuta, garraioaren alorrean egingo diren urrats nagusiak azalduko ditu. Ekintza-planaren aurrerapena izango da, publiko egin aurretik.

Azkenik, energiaren atalean Eider Murgoitiok, Goienerreko kideak, energia-trantsizioak eskualde bati planteatzen dizkion erronkak eta horiei komunitatetik erantzuteko dauden aukerak aurkeztuko ditu, tokiko ikuspegitik eta urte hauetan guztietan metatutako esperientziatik.

Antolatzaileek aurreratu dutenez, «ez da ohiko hitzaldi-jardunaldi bat izango». Behin adituen aurkezpenak entzunda, lan-mahaiak osatuko dira eta eragileek horietan jardungo dute, modu berezi batean. Izan ere, elikadura, garraioa eta energia bereizita landuko dira. Helburua honako galdera honi erantzutea da: Zer egin nahi dugu Urola Erdian datozen urteetan, arlo bakoitzean aurrera egiteko?

Mahai bakoitzean, «erronka nagusiak kontrastatuko dira, eskualdean martxan jar daitezkeen proiektuak aztertuko dira eta lehentasunezko jardun-ildoak identifikatuko dira», aurreratu dute. Hurrengo urratsak zehaztea da helburua: zer egin, zer lehenetsi eta zer eragileren arteko lankidetza behar den identifikatzea.

Amaieran, taldeetan landutakoa partekatuko da, eskualde osorako ikuspegi bateratua osatzeko.