A! gjörningahátíð hefst á Akureyri í kvöld og verða sem fyrr margir áhugaverðir viðburðir í boði.

Klukkan 19.30 í kvöld verða nemendur á listnáms- og hönnunarbraut í Mjólkurbúðinni – sal Myndlistarfélagsins með gjörning sem þeir kalla Dómarinn / The Judge.

Í kynningu á gjörningnum segir:

Að dæma einhvern við fyrstu kynni.
Dómarinn fjallar um samfélagið og endurspeglaða hugmynd þess á eigin sjálfsmynd. Hafa samfélagsmiðlar áhrif á sjálfsmynd ungmenna? Hefur samfélagslegt umhverfi áhrif á tjáningu? Stendur þú ósjálfrátt sem dómari samfélagsins?

A! gjörningahátíð var fyrst haldin árið 2015 og hefur vaxið með hverju árinu. Arna G. Valsdóttir, kennari á listnáms- og hönnunarbraut, hefur frá byrjun lagt drjúgt af mörkum við skipulagningu og framkvæmd hátíðarinnar og hún er einmitt kennari nemendanna á listnáms- og hönnunarbraut sem sýna gjörninginn í kvöld í Mjólkurbúðinni. Það skal tekið fram að nemendur listnáms- og hönnunarbrautar hafa frá upphafi tekið þátt í A! gjörningahátíð en núna á haustönn er í fyrsta skipti kenndur sérstakur áfangi fyrir nemendur á þriðja ári listnáms- og hönnunarbrautar sem ber yfirskriftina Innsetningarverk og gjörningalist.

Í lýsingu á áfanganum segir:

Nemandinn vinnur með listformin innsetningaverk og gjörningalist auk þess að kanna tengsl þeirra við sviðslistir. Nemandinn fær þjálfun í að vinna með rými, tíma og líkama og þróar eigin verk með fjölbreyttum miðlum listformanna. Áhersla er á skapandi hugmyndavinnu, tilraunir, skráningu ferlis og gagnrýna umræðu. Nemandinn kynnist og kynnir sér verk listamanna sem vinna rýmistengd verk. Hann ígrundar verk sín í samvinnu við kennara og samnemendur. Hluti námsins fer fram í tengslum við valda list- og menningarviðburði í nærumhverfinu.

Fjórtán viðburðir verða á A! gjörningahátíð, sem eins og fyrr segir hefst í kvöld og verður líka annað kvöld og lýkur á laugardagskvöldið. Hér er dagskrá hátíðarinnar.