• Kabla ya kuamua kumchagua mtu kwa sababu ya kipaji, mvuto wa kimwili au urembo, ni muhimu kuangalia kile kilicho ndani yake.

Dar es Salaam. Kutafuta mchumba ni hatua muhimu inayoweza kuamua kwa kiasi kikubwa maisha ya mtu katika ndoa.

Hata hivyo, watu wengi wanapofanya uamuzi wa kuanzisha uhusiano wenye lengo la ndoa, huvutiwa na mambo ambayo yanaweza kuwa hayana mchango mkubwa katika kujenga ndoa imara na yenye furaha.

Kwa mseja, ni rahisi kuvutiwa na mtu kutokana na kipaji chake, mwonekano wake au urembo wake.

Lakini mvuto wa awali si lazima uwe msingi mzuri wa maisha ya ndoa. Haya ni baadhi ya makosa ambayo watu wengi huyafanya wanapotafuta wenza wa maisha.

Kosa la kutazama kipaji

Kuna watu huvutiwa na mtu kwa sababu tu ana kipaji fulani. Anaweza kuwa mwanamuziki mwenye uwezo mkubwa wa kupiga vyombo vya muziki, mwimbaji mwenye sauti nzuri, mcheza mpira, mwigizaji au mchekeshaji anayependwa na wengi.

Kipaji hicho kinaweza kumfanya mtu aonekane wa kipekee na hivyo kuchochea hisia za kutaka kuanzisha naye uhusiano wa kimapenzi.

Lakini swali muhimu ni hili: Kipaji hicho kina mchango gani katika kujenga ndoa yenye afya na furaha?

Tatizo si kuwa na kipaji, bali kukifanya kipaji kuwa sababu kuu ya kumchagua mtu wa kuishi naye maisha yote.

Ndoa inapofika katika hatua ya kukutana na changamoto za kila siku, mambo kama uwezo wa kuwasiliana, uaminifu, heshima, uwajibikaji, uvumilivu na utayari wa kutatua migogoro huwa na uzito mkubwa kuliko umahiri wa kuimba au kucheza.

Ndiyo maana mtu anaweza kuvutiwa sana na mwanamuziki kwa sababu ya sauti yake nzuri, lakini baada ya kuingia katika ndoa akagundua kuwa sauti hiyo haijamsaidia kukabiliana na migogoro ya kifamilia.

Vivyo hivyo, umaarufu au kipaji kinaweza kuvutia macho ya watu, lakini hakiwezi kuwa dhamana ya ndoa yenye amani.

Kutazama mvuto wa kimwili

Mvuto wa kimwili ni sehemu ambayo mara nyingi huwavutia watu wanapoanza uhusiano. Mtu anaweza kuvutiwa na mwingine kwa sababu ya urefu wake, umbo lake, ngozi nzuri, nywele, tabasamu, meno, mavazi au mwonekano wake kwa ujumla.

Ingawa mvuto wa kimwili unaweza kuwa sehemu ya kuvutiwa na mtu, kuufanya kuwa msingi mkuu wa kuchagua mwenza ni kosa linaloweza kugharimu baadaye.

Mwonekano hubadilika kadiri miaka inavyopita. Changamoto za maisha, umri, uzazi, kazi na mazingira mbalimbali vinaweza kubadilisha sura na mwili wa mtu.

Hivyo, ikiwa msingi wa uhusiano ulikuwa ni uzuri wa nje pekee, mtu anaweza kujikuta akikatishwa tamaa anapokutana na hali halisi ya maisha ya ndoa.

Zaidi ya hayo, mvuto wa macho hauwezi kutengeneza mawasiliano mazuri, uaminifu wala heshima kati ya wanandoa.

Mtu anaweza kuwa na sura nzuri lakini akawa hana uwezo wa kusikiliza, kusamehe, kuheshimu mwenza au kubeba majukumu ya familia.

Katika Mithali 31:30, maandiko yanasema: “Uzuri ni ubatili, bali mwanamke amchaye Bwana ndiye atakayesifiwa.” Ujumbe huu unasisitiza umuhimu wa kutazama zaidi ya mwonekano wa nje.

Mtu anayemtafuta mwenza wa maisha anapaswa kujiuliza maswali ya msingi: Je, huyu mtu ana tabia gani? Ana mtazamo gani kuhusu familia? Anaaminika? Ana uwezo wa kusuluhisha migogoro kwa busara? Anaheshimu wengine? Ana maadili yanayolingana na yangu?

Urembo unaweza kuvutia macho, lakini tabia ndiyo huonekana zaidi katika maisha ya kila siku.

Ndoa inapokumbana na changamoto, si sura nzuri wala mwili wenye mvuto unaobeba familia, bali ni tabia, upendo, heshima, uaminifu na uwajibikaji wa wahusika.

Kwa hiyo, kabla ya kuamua kumchagua mtu kwa sababu ya kipaji, mvuto wa kimwili au urembo, ni muhimu kuangalia kile kilicho ndani yake.

Mambo ya nje yanaweza kuvutia mwanzoni, lakini sifa za ndani, ndizo zinazoweza kusaidia kujenga msingi wa maisha ya pamoja.