Etxean sortzen diren hondakin organikoak modu deszentralizatuan kudeatzeko aukerak azaldu zituzten martitzenean, hilak 22, udaletxeko osoko bilkuren aretoan egindako etxeko konpost ikastaroan. Gorbeialdeko Kuadrillak eta Aramaioko Udalak antolatu zuten, hondakin organikoen kudeaketa etxean bertan egiteko ezagutzak eta tresnak emateko.

Egun, etxeko konpostajeko familia erabiltzaile kopurua guztira, 159 etxebizitza –edo familia– dira Aramaion; auzo-konpostaje guneetan 83 familiak parte hartzen dute; eta horiez gain, konpost gune propioa jarri zuten martxan aurreko ikasturtean eskolan, jantokiko hondar organikoak zein sukaldekoak kudeatzeko.

Gorbeialdeko Kuadrillako Ingurumen teknikari Jon Toñak azaldu duenez, bi helburu ditu ikastaroak: "Alde batetik, orain arte egiten ez zutenek ikasteko aukera izatea; eta, bestetik, dagoeneko egiten dutenei zalantzak argitzeko eta partekatzeko espazio bat ematea".

Izan ere, Gorbeialdeko udalerriek urte batzuk daramatzate hondakinen kudeaketa eredu deszentralizatuaren aldeko apustua egiten. Toñaren arabera, landa izaerako udalerriak izanik, "iraunkortasunaren ikuspuntutik, zentzudunena da organikoa bertan kudeatzea". Horretarako, hainbat aukera ematen dituzte, eta horien artean dago etxeko konpostatzea.

Aramaion, gainera, konposta aspalditik dago nahiko barneratuta herritarren artean. "Jendeak aspalditik dauka ohitura hori, eta oso barneratuta dagoela esango nuke", azaldu du Toñak. Hala ere, ikastaroek praktika hori egin nahi duten herritar berriei ere bidea irekitzen dietela azpimarratu zuen.

Saioaren helburua ez zen izan materia organikoaren deskonposatze prozesua modu teorikoan azaltzea: "Oso tailer praktikoa izaten da. Helburua da modu praktikoan edozeinek bere etxean konpostagailu baten maneiua nola egin behar duen ikastea".

Horretarako, konpostagailuaren kudeaketarako oinarrizko irizpideak azaldu zituzten, eta etxean sortzen den materia organikoa nola tratatu erakutsi zuten. Zalantzak ere argitu zituzten. Izan ere, dagoeneko konposta egiten duten herritarrentzat ere baliagarria da ikastaroa. "Askotan, konposta egiten dutenek zalantza bertsuak izaten dituzte, edo oztopo edo arazo ia berak", dio Toñak. Esperientziak partekatzea eta arazo horiei irtenbidea ematea ere ikastaroaren parte izan ziren.

Konposta egiten hasi nahi duten herritarrek beharrezko materiala eskatu ahal izango dute udaletxean. Horrela, hondakin organikoen sorrera jatorrian murrizteaz gain, materia organikoaren zikloa itxi eta lurzorura baliabide hori itzultzea sustatu nahi dute.