San Miel jaietako urteroko ohiturak jarraituz, Magale Ikastetxeko ikasleek danbor- eta barril-soinuez esnatu dute herria igande honetan. San Juan plazatik hasita eta toki berdinean bukatuta, danbor-joleek ibilbide biribila burutu dute Urnietako kaleetan barrena murgilduz, Zubieta eta Etxeberri plazetan geldialdi bereziak eginez eta lauzpabost abesti joz.

50 haur baino gehiago bildu dira goizeko 11:40an Magale Ikastetxeko ateetan, bertatik denak batera herriko plazara hurbiltzeko. Guraso, anai-arreba eta aiton-amon ugari ere gerturatu dira haien haurren momentu berezia ikustera. Ikusle txikienek haien danborrak ere eraman dituzte, Magaleko ikasleekin batera instrumentuak energia eta gogo handiz kolpatzen laguntzeko.

Eguraldi eguzkitsua lagun izanda, haurrek ibilbide guztia egin dute eta beroari aurre egiteko arduradunek urez betetako spray batzuk zeramatzaten umeak freskatu ez ezik, hauek dibertitu zitezen.

Danbor- eta barril-joleez gain, ikurrin-eramaileek ere haien protagonismoa izan dute, izan ere, San Juan plazako oholtzaren gainean ibili ziren gainontzekoak kontrolatzen. Parte-hartzaile txikienak haiekin egon dira ibilbide osoan zehar ikusleei goxokiak botatzen.

Urte luzeak daramatza ikastetxean danborrarekin Urnietako festak girotzen. «Nik txikitan beti hartzen nuen parte eta asko gustatzen zitzaidan, orain nire alaba janzkera honekin ikusteak asko pozten eta harrotzen nau», azaldu zuen Urnietako bizilagun batek nostalgiaz.

Arratsaldean buruhandiek hartu dute danbor-joleen erreleboa, haurrek hainbeste miresten duten unea. Buruhandiek, erraldoiek eta txistulariek Urnietako kale guztiak zeharkatu dituzte umeen atzetik korrika ateraz, hauek buruhandiak zirikatzen zituzten bitartean. Urnietarrak hainbeste gogorekin itxaron dituzten festak erdialdera iritsi diren arren, oraindik jai giro asko geratzen da aurretik.