2022tik egin gabe zeuden sokamutur txikiak berreskuratu dituzte aurten Zezen Beltz asteburuan. XVIII. aldiz, zezenek eta haien inguruko ekitaldiek hartu dute Azpeitia, eta aurtengo egitarauak nobedade garrantzitsuak izan ditu. Izan ere, entzierro txikian haurrek parte hartzeko aukera izan dute, Erdikaletik plazara bitarteko ibilbidean. Umeez gain, «guraso eta heldu ugari gerturatu da ikuskizunera», azaldu dute Zezen Beltz elkarteko antolatzaileek.

Eguraldi txarrak baldintzatu zituen larunbateko ekitaldiak. Hala ere, eguraldi kaskarra egin arren, «bai zezen txikiekin, bai poniekin jolastera jende ugari gerturatu zen. Herriko bestelako jaietan ere sokamutur txikiak eskatu zituen jendeak», adierazi dute antolatzaileek.

Goizeko sokamutur txikian ez bezala, arratsaldeko Grand Prix saioa eguraldiak baldintzatu zuen. Euriak jende ugari atzera bota zuen, eta askok ez zuten zezen plazara gerturatzeko hautua egin. Hala ere, 1.330 lagun inguru bildu ziren saioan. «Eguraldia eta bildutako jende kopurua kontuan hartuta, balorazio positiboa egiten dugu», azaldu dute Zezen Beltz elkartekoek.

Igandean eguraldi argitsua esnatu zen, eta horrek asko lagundu zien Zezen Beltz asteburuko ekitaldiei. Eguerdian, esaterako, jende ugari gerturatu zen plazara. Ohiko parrilladaren ordez, paella-jana antolatu zuten Zezen Beltz elkartekoek, eta aldaketa «positibotzat» jo dute.

Arratsaldeko entzierroak ere jendetza bildu zuen. Ondoren, zezena aske ibili zen Hartzubian, eta harrera oso ona izan zuen. Oro har, beraz, asteburuaren balorazio «oso ona» egin dute elkarteko antolatzaileek.