01/10/2026 Actualizado a las 15:53h.

Urola Kostako Udal Elkarteak HAZILAN+ programa jarri du abian, kualifikazio-maila ertain-altua duten pertsonen enplegagarritasuna hobetzeko eta laneratzea errazteko.

Programa bereziki zuzenduta dago lan bila dabiltzan pertsonei, lehen lan-esperientzia lortu nahi duten gazteei eta beren ibilbide profesionala hobetu edo lan-aukera berriak aztertu nahi dituztenei. Parte hartu ahal izateko, beharrezkoa da langabezian egotea, erdi-mailako, goi-mailako edo unibertsitateko titulazioa izatea eta Urola Kostako eskualdeko udalerriren batean erroldatuta egotea.

HAZILAN+ programaren barruan eskaintzen den OSATU ibilbideak prestakuntza, orientazio pertsonalizatua eta enpresetako praktikak uztartzen ditu, parte-hartzaileek lan-merkatuan eskatzen diren gaitasun pertsonalak eta profesionalak garatu eta benetako lan-esperientzia eskuratu dezaten. Prestakuntza azaroaren 16an hasi eta abenduaren 22ra arte egingo da. Ondoren, urtarriletik aurrera, parte-hartzaileek 200 orduko praktikaldia egingo dute eskualdeko enpresetan.

Programa hiru fasetan egituratzen da: Aktibatu (80 ordu): taldeko saio dinamikoen bidez gaur egungo enpresek gehien baloratzen dituzten zeharkako gaitasunak landuko dira: autoezagutza, komunikazioa, talde-lana, gatazken kudeaketa, erresilientzia, berdintasuna edo lidergoa, besteak beste. Saioak astelehenetik ostegunera izango dira, goizez.

Orientazioa eta jarraipen pertsonalizatua (30 ordu): parte-hartzaile bakoitzak tutore baten laguntzarekin bere profil profesionala indartzeko eta laneratzeko estrategia pertsonalizatua garatuko du. Enpresetako praktikak (200 ordu): prestakuntza amaitu ondoren, parte-hartzaileek eskualdeko enpresetan benetako lan-ingurunean aritzeko aukera izango dute, esperientzia eskuratuz eta tokiko enpresa-sarearekin harremanak sortuz.

Programa honetan parte hartu nahi dutenek azaroaren 11ra arte eman ahal izango dute izena Urola Kostako Udal Elkartearen webgunean eskuragarri dagoen formularioaren bidez. Programa hobeto ezagutzeko interesa duten parte-hartzaileek, bi informazio-saio ireki antolatu dira Urola Kostako Udal Elkartearen egoitzan. Ez da aurrez izena eman behar.

Lehenengoa urriaren 16an (ostirala), 10:30ean egingo da eta bigarrena, urriaren 22an (osteguna), 10:30ean. Informazio gehiago posta elektronikoaren bitartez, lanpoltsa@urolakosta.eus helbidean edo bestela telefono zenbaki honetara deituz, 943 89 08 08.

HAZILAN+ programa Euskadiko 16 garapen-agentziaren bidez garatuko da, eta 1.400 pertsona baino gehiagok parte hartzea aurreikusten da.