01/09/2026 Actualizado a las 21:54h.

Esperantzak eta getariarrek hitzordu galdu ezina dute gaur arratsaldean Donostian. Kontxako Banderan hurrengi bi asteburutan egotea da Ion Larrañagaren mutilek gaur lortu nahi dutena eta horren bila joango dira.

Gizonezkoen 24 traineru egongo dira badian eta bi multzotan banatuko dituzte, TKE Ligakoak, hamabi, alde batetik, eta beste guztiak bestetik. Getariarrak beraz, multzo nagusian egongo dira eta helburua garbia da: irailak 6 eta 13an Donostian egotea.

Denboraldian egindakoa kontutan izanik, ez lukete arazo gehiegirik izan behar zazpi denbora onenen artean sartzeko, baina egun bateko lana da, ez dago bigarren aukerarik eta dena eman beharko dute badaezpada, sailkapen txartela eskuratzeko.

Azken asteburuan egindako lanak itxaropentsu egoteko arrazoiak ematen ditu. Boiro eta Aresen egindako Eusko label Ligako estropadetan erakutsi zuten beste behin, onenen artean kokatuta dagoela denboraldi honetan Esperantza.

Bi estropadetan laugarren bukatu zuten eta sailkapen orokorrean Bermeorekin duten borroka mantentzen da hirugarren postua lortzeagatik.

Urdaibai izan zen bizkorragoa larunbatean eta bi puntuko aldea atera zion getariar traineruari, berdinduta hasi zuten asteburua, baina igandean Areseko uretan puntu bat kentzen zion GAEko ontziak eta une hauetan azken bi estropada geratzen direnean, puntu bakarreko abantaila dute Bermeokoek. Azken jardunaldi horiek, Bermeon eta Portugaleten, erabakiorrak izango dira eta sailkapen historikoa lor dezakete getariarrek lana ondo egiten badute.

Lurraldebuseko zerbitzu bereziak izango dira gaur Donostian jokatuko den gizonezkoen sailkapen-estropadarako. Getariako Udalak Aldundiari egindako eskaerari erantzunez, zerbitzu berezi horiek jarri dira.

Hala, UK10 lineak (Zumaia-Donostia) zerbitzu berezia izango du Zumaiatik 16:00etan eta Donostiatik 21:00etan. UK11 lineak (Zumaia-Donostia, AP-8tik Zarautzen barrena) ere zerbitzu bereziak eskainiko ditu: Zumaiatik 16:30ean eta Donostiatik 19:30ean.