అక్టోబర్ 10న ఢిల్లీలోని జంతర్ మంతర్ వద్ద భారీ నిరసన చేపట్టనున్నట్లు కాక్‌రొచ్ జనతా పార్టీ (CJP) ప్రకటించింది. ప్రత్యేక సమగ్ర ఓటర్ల జాబితా సవరణ (SIR) ప్రక్రియను వెంటనే నిలిపివేయాలని, 2025 జూన్ 25 నుంచి ఓటర్ల జాబితా నుంచి తొలగించిన పేర్లన్నింటినీ తిరిగి చేర్చాలని కూడా CJP డిమాండ్ చేస్తోంది. లెఫ్ట్ వింగ్ విద్యార్థి సంఘాలు కూడా ఈ నిరసనలో పెద్ద సంఖ్యలో పాల్గొంటామని ప్రకటన విడుదల చేశాయి. జంతర్ మంతర్‌లోకి ప్రవేశించేందుకు ప్రయత్నించిన సీజేపీ (CJP) నేతలను పోలీసులు అదుపులోకి తీసుకున్నారు.

ఈ నేపథ్యంలో, సోషల్ మీడియాలో ఒక వీడియోను (ఇక్కడ, ఇక్కడ, ఇక్కడ) షేర్ చేస్తూ, 2026 అక్టోబర్ 10న ప్రధాన ఎన్నికల కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ ఢిల్లీలో జరిగిన నిరసనలను ఇది చూపిస్తోందని ప్రచారం చేస్తున్నారు. దీని వెనుక ఎంత నిజముందో ఇప్పుడు చూద్దాం.

ఆర్కైవ్ చయ్యబడ్డ పోస్టును ఇక్కడ చూడవచ్చు.

క్లెయిమ్: ఈ వీడియో 10 అక్టోబర్ 2026న ఢిల్లీలో ప్రధాన ఎన్నికల కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ జరిగిన నిరసనలను చూపిస్తుంది.

ఫాక్ట్: ఈ వీడియో 10 అక్టోబర్ 2026న ఢిల్లీలో జ్ఞానేష్ కుమార్ రాజీనామా చేయాలని డిమాండ్ చేస్తూ జరిగిన నిరసనలకు సంబంధించింది కాదు. ఈ వీడియోను ఫిలిప్పీన్స్‌లోని ఇలిగన్ నగరంలో చిత్రీకరించారు. అయితే, ఈ వీడియోను ఖచ్చితంగా ఎప్పుడు, ఏ సందర్భంలో చిత్రీకరించారో తెలియదు. కాబట్టి, ఈ పోస్టులో చేస్తున్న వాదన తప్పుదారి పట్టిస్తుంది.

వైరల్ వీడియోను పరిశీలించగా, ఒక ఫుట్ ఓవర్‌బ్రిడ్జిపై “Diyandi Festival” అనే పదాలతో ఉన్న హోర్డింగ్ కనిపించింది. దీని గురించి వెతికితే, ఫిలిప్పీన్స్‌లోని ఇలిగన్ నగరంలో ప్రతి సంవత్సరం సెప్టెంబర్‌లో దియాండి పండుగను జరుపుకుంటారని తెలిసింది. నగర సంరక్షకుడైన సెయింట్ మైఖేల్ ఆర్చ్ఏంజెల్ గౌరవార్థం నిర్వహించే ఈ పండుగ సెప్టెంబర్ 29న ముగుస్తుంది.

వైరల్ వీడియోలో “Shann Gadget” అనే పేరుతో ఉన్న బోర్డులను కూడా గమనించాం. గూగుల్ మ్యాప్స్‌లో వెతకగా, ఫిలిప్పీన్స్‌లోని ఇలిగన్ నగరంలో రోక్సాస్ అవెన్యూలో, గైసానో సిటీ సూపర్‌మాల్‌కు ఎదురుగా ఈ దుకాణం ఉన్నట్లు తెలిసింది. 

గూగుల్ స్ట్రీట్ వ్యూలో పరిశీలించగా, వైరల్ వీడియోలో కనిపించే ప్రదేశానికి, స్ట్రీట్ వ్యూ చిత్రాల్లోని ప్రదేశానికి మధ్య పలు పోలికలు కనిపించాయి. దీంతో ఈ వీడియోను ఫిలిప్పీన్స్‌లోని ఇలిగన్ నగరంలోనే చిత్రీకరించినట్లు నిర్ధారించాం.

అయితే, ఈ వీడియోను ఖచ్చితంగా ఎప్పుడు చిత్రీకరించారు, ఏ సందర్భంలో చిత్రీకరించారు అనే విషయాలను మేము గుర్తించలేకపోయాం. అందుబాటులో ఉన్న ఆధారాల ప్రకారం, ఈ వీడియోను ఫిలిప్పీన్స్‌లోని ఇలిగన్ నగరంలో చిత్రీకరించారు. దీనికి ఢిల్లీలో జరిగిన నిరసనలకు ఎలాంటి సంబంధం లేదు.

చివరిగా, ఫిలిప్పీన్స్‌కు చెందిన ఒక సంబంధం లేని వీడియోను, ఢిల్లీలో జరిగిన CJP నిరసనల వీడియోగా తప్పుగా షేర్ చేస్తున్నారు